Stefnuyfirlýsing Solaris

Tilgangur samtakanna er að bregðast við þeirri neyð sem hælisleitendur og flóttafólk býr við víða á Ísland, sem birtist meðal annars í bágum aðstæðum, félagslegri einangrun og skorti á aðgengi að nauðsynlegri þjónustu, eins og til dæmis heilbrigðisþjónustu. 

​

Markmið samtakanna er að þrýsta á umbætur í málefnum hælisleitenda og flóttafólks á Íslandi og að mannúð og réttlæti sé haft að leiðarljósi í málaflokknum, að berjast fyrir bættri stöðu flóttafólks og hælisleitenda hér á landi og fyrir því að mannréttindi þeirra og önnur grundvallarréttindi séu virt. 

Samtökin taka skýra afstöðu gegn öllum birtingarmyndum fordóma, útlendingaandúðar, hatursorðræðu og rasisma í garð fólks á flótta.

 

Samtökin berjast gegn mismunun, óréttlæti og öfgum sem beinast að fólki á flótta og hafna öllum málflutningi sem ýtir undir slíkt. Samtökin leggja áherslu á að íslenskum stjórnvöldum beri siðferðisleg skylda til þess að veita fólki á flótta skjól og vernd hér á landi og að íslensku samfélagi beri skylda til þess að vernda  jaðarsetta hópa eins og fólk á flótta frá áreitni og ofbeldi eins og hatursorðræðu og hatursglæpum.

​

Tilgangi sínum og markmiðum hyggjast samtökin ná með nánu samstarfi við almenning, yfirvöld og önnur samtök sem vinna að sama tilgangi og markmiðum. Með virkri þátttöku í samfélagslegri umræðu um málefni sem snúa að hagsmunum skjólstæðinga samtakanna, tilgangi þeirra og markmiðum. Með uppfræðslu, meðal annars um málefni fólks á flótta, mannréttindi og fjölmenningu með það að markmiði að auka samkennd og sporna gegn fordómum og mismunun.